Юуны өмнө орон сууцаа зөв сонгох хэрэгтэй. Өөрийн хэрэгцээндээ ямар орон сууц сонгох нь маш чухал. Хамгийн чухал нь санхүүгийн боломж бололцоондоо тааруулж тооцох ёстойгоо мартаж болохгүй. Санхүүгийн боломжиндоо тааруулж сонгох уу, сэтгэл хөөрлөөр сонгож дараа нь санхүүгийн дарамтад орох уу гэдгийг шийдэх хэрэгтэй. Өөрт тохирсон, өөрийн боломжиндоо таарсан орон сууцыг сонгох хэрэгтэй

Урьдчилгаа төлбөр аль болох ихийг цуглуул. Та өөрийн хүссэн байраа худалдан авахад зарцуулагдах хугацааг нарийн тодорхойлон хугацаатай хадгаламж нээх хэрэгтэй. Сар бүрийн тогтмол орлогоос тодорхой хэсгийг зорилготой хуримтлалруугаа хийгээрэй.

Хүний анхдагч гурван хэрэгцээний нэг бол яах ч аргагүй орон сууц юм. Ажил гэр хоёр ойрхон байх эсвэл хүүхдийн сургууль цэцэрлэг ойрхон байх нь танд маш олон давуу талыг авчирна. Тиймээс та өөрт хамгийн ойр хэрэгцээт орон сууцыг сонгоорой.

Орон сууц авахаар төлөвлөж байгаа бол судалгаа хийх нь маш чухал. Тухайн газар төвийн шугамтай холбогдсон байна уу? Барилгын компани өмнө нь ямар барилга барьж байсан бэ? гэх мэт олон мэдээллийг шалгах ёстой. Гэвч энгийн иргэд энэхүү мэдээллээс хол байдгаас болж алдах нь олонтой. Мэдээлэлтэй ойр байдаг мэргэжлийн хүнээс зөвлөгөө аваарай

Түрээсээр худалдан авсан орон сууцаа эд хөрөнгийн даатгалд даатгуулах бөгөөд энэ нь ирээдүйд учирч болох ус алдах, галын аюулаас хамгаална. Энэхүү даатгалын хураамжийг орон сууцны үнэлгээний дүнгээс тооцдог. Санхүүгийн түрээсийн үлдэгдэл дүнгээс тооцож амь нас болон гэнэтийн ослын даатгалд хамруулдаг. Энэхүү даатгал нь ирээдүйд учирч болзошгүй олон эрсдэлүүдээс хамгаална.

Та ипотекийн нөхцөл хангаад орон сууцны зээл авах хүсэлтэй байгаа бол таны орлого урт хугацаанд тогтвортой 5-6 жилийн дараа ч сар тутамд төлдөг төлбөрийг төлөх чадвартай байх уу гэдгийг бодолцох хэрэгтэй. Харин нөгөө талд гадаадад ажиллаж амьдардаг цалин орлого сайтай та урт хугацааны орон сууцны зээл авах нь эрсдэлтэй. Гадаад оронд 5 жил ажиллаад эх орондоо буцаж ирж амьдрах хүсэлтэй, явсан зорилго нь өөрийн гэсэн орон сууцтай болох төлөвлөгөөтэй бол богино хугацааны хүүгийн төлбөр багатай, орлого өндөр байх үедээ төлөөд дуусгах зээл нь тохиромжтой. Тиймээс хүн бүрт таарах лизингийн нөхцөл өөр учир та өөрт тохирох хамгийн тааламжтай лизингийн нөхцөлийг сонгоорой.